Hvalveiðar til lengri tíma

Ástæða er til þess, að þakka Einari Kristni Guðfinnssyni sjávarútvegsráðherra, vasklega framgöngu í hvalveiðimálinu. Ákvörðun hans sem byggir á samþykkt Alþingis, er bæði rökrétt og skynsöm. Við Íslendingar erum fiskveiðiþjóð og nýtum náttúrugæði okkar, til þess að afla sveltandi mannkyni matar. Sú einstaka stefna sjálfbærni sem við höfum alltaf fylgt í hvalveiðum, er okkur til sóma. Hvalaafurðir eru okkur mikilvægar í gjaldeyrisöflun og atvinnusköpun.

Ansi eru sumir landar okkar komnir langt frá uppruna sínum, þegar þeirra helsta áhugamál, er að berjast með kjafti og klóm, gegn lífsbjörg þjóðarinnar, nýtingu náttúruauðlindanna. Við Vestfirðingar skulum reyna að koma þessu ágæta fólki í skipsrúm hjá Konna Eggerts, þannig að það geti unnið fyrir sér við aðstæður sem krefjast manndóms, skapað verðmæti fyrir þjóðarbúið, um leið og migið er í saltan sjó. Hvaðan kemur þessu fólki vald til þess, að telja sig talsmenn náttúruverndar? Þeir sem nýtt hafa auðlindir hafsins í áratugi með sjálfbærni í huga, eru miklu betur til þess fallnir, að vera kallaðir náttúrusinnar. Þeir lifa á auðlindinni og ætla afkomendum sínum hið sama.

Fyrir álit Norðurlandaráðs gef ég ekkert. Þessar ágætu "frændþjóðir" okkar, hlupu eins og rottur í felur, þegar stórsjóir bankahrunsins dundu á okkur. Aðeins Færeyingar stóðu með okkur í briminu. Spyrjum þá álits á hvalveiðum okkar.......þeir eru fiskveiðiþjóð, eins og við Íslendingar.

 

Hvaða munur er á þessum syndandi kúm og hinum sem eru á þurru landi? Ekki hefur mikið heyrst um andmæli gegn nýtingu þeirra til manneldis, þó þær sem á þurru landi lifa, standi okkur nú nær...blessaðar.....

Þá fara veiðar og skoðun hvala mjög vel saman, eins og dæmin sanna.

Athugasemdir

[Hjörleifur Guttormsson, 28.1.2009 kl. 17:17]

Sæll Magnús.

Eins og fram kemur á bloggsíðu minni stóð Einar K. Guðfinnsson sig framan af nokkuð vel á stóli sjávarútvegsráðherra. Nú undir lok ferils síns hefur hann þó gert í bólið sitt, annars vegar með útgáfu viðbótarkvóta í þorski til tveggja ára og nú sitjandi í starfsstjórn með útgáfu reglugerðar um stórhvala- og hrefnuveiðar til 5 ára.

Þetta eru dapurlegar og fálmkenndar ákvarðanir sem spilla fyrir skynsamlegri auðlindanýtingu hérlendis og munu varpa löngum skugga á orðstír Íslands erlendis. Var þó ekki á bætandi eftir bankahrunið sem ríkisstjórn Geirs H. Haarde ber ábyrgð á.

Aukinn þorskveiðikvóti gengur gegn þeirri 20% aflareglu sem ráðherrann hafði áður tekið undir og setur stórt spurningarmerki við það einhliða vald sem sjávarútvegsráðherra, hver sem hann er, hefur fengið til að ákvarða aflamark í einstökum tegundum nytjastofna.

Hvalveiðireglugerðin mun ekki standa lengi, spái ég, eftir að ný stjórn hefur verið mynduð. Útgáfa hennar ber vott um örvílnun. Björg Thorarensen lagaprófessor segir skv. forsíðufrétt í Morgunblaðinu 28. janúar að unnt eigi að vera að breyta slíkri ákvörðun ráðherra í starfsstjórn án þess að það baki ríkinu skaðabótaábyrgð.

[Kolbrún Stefánsdóttir, 28.1.2009 kl. 20:34]

Sæll Magnús. Fínn pistill hjá þér. Ég er alveg ósammála Hjörleifi eins og við er að búast. Mér finnst fráfarandi sjávarútvegsráðherra ná sér í nokkur stig í restina en hefði mátt úthluta meiri þorskkvóta eins og við Frjálslynd lögðum til. Með kveðju Kolla.

[Magnús Jónasson, 29.1.2009 kl. 00:01]

Hæ Kolla, því miður eru þeir alltof margir á Íslandi sem sklija ekki ennþá á hverju þjóðin lifir. Einar er aðeins að fylgja eftir samþykkt meirihluta Alþingis. Það er alveg ljóst, að fyrir þessu er meirihluti á Alþingi, annars hefði þetta ekki verið gert! kv, M